7 верасня 2024 г. у Цэнтральным батанічным садзе НАН Беларусі (Сурганава 2В, г. Мінск) адбудзецца Фестываль навукі-2024.
Лекцыі
Ці ведаеце вы, што такое грыжанка, цыбрыкі і завіванцы? Чым адрозніваецца банкуха ад шакоціса? Якая начынка ў загадкавых клёцак з душамі?
З лекцыі можна даведацца пра самыя незвычайныя стравы беларускай кухні і традыцыі, звязаныя з іх падрыхтоўкай, а таксама пазнаёміцца з рэгіянальнымі гастранамічнымі асаблівасцямі.
Вясельныя традыцыі – важная і добра знаёмая нам частка святкавання. Многія з іх ідуць каранямі ў мінулае і нясуць глыбокі сакральны сэнс. На лекцыі пазнаёмімся з вясельнымі традыцыямі нашых продкаў і даведаемся, якую ролю выконвалі пэўныя вясельныя атрыбуты, які сэнс быў схаваны ў вясельных рытуалах і як яны ўплывалі на далейшае жыццё маладых, паразважаем, чаму многія старадаўнія абрады не практыкуюцца на сучасных вяселлях.
ДЭМАНСТРАЦЫІ НА ПОДЫУМЕ
ВЕРА КОМЛІК, дызайнер, малодшы навуковы супрацоўнік Інстытута мастацтвазнаўства, этнаграфіі і фальклору імя Кандрата Крапівы Цэнтра даследаванняў беларускай культуры, мовы і літаратуры НАН Беларусі
Паказ аўтарскай калекцыі жаночага адзення па матывах беларускага традыцыйнага касцюма.
ПАСПРАБУЙ СЯБЕ Ў КАВАЛЬСКАЙ СПРАВЕ
Цэнтр даследаванняў беларускай культуры, мовы і літаратуры НАН Беларусі
Наведвальнікі змогуць даведацца аб нюансах кавальскай справы і прыняць удзел у стварэнні бытавых прыладаў і элементаў адзення нашых продкаў.
