16–17 мая 2024 года старшы навуковы супрацоўнік аддзела беларускай літаратуры ХХ і ХХІ стст. Інстытута літаратуразнаўства імя Янкі Купалы Цэнтра даследаванняў беларускай культуры, мовы і літаратуры НАН Беларусі Любоў Дуктава сумесна з аспірантам БДУ Лі Сяосюем правяла ва ўстановах адукацыі горада Магілёва (у ліцэі міждзяржаўнай адукацыйнай установы вышэйшай адукацыі "Беларуска-Расійскі ўніверсітэт" імя Л.Я. Маневіча і ў дзяржаўнай установе адукацыі "Сярэдняя школа № 42 г. Магілёва") майстар-класы на тэму "Літаратурная спадчына Беларусі і Кітая. Культурны код як падмурак для разумення нацыянальных вобразаў у прыгожым пісьменстве”.

Падчас творчых сустрэч размова вялася аб важным складніку нацыянальнага брэнда – культурнай спадчыне Беларусі і Кітая. Магілёўскія ліцэісты і школьнікі, а таксама аспірант БДУ Лі Сяосюй чыталі вершы беларускіх класікаў Максіма Багдановіча, Янкі Купалы, Якуба Коласа на беларускай і кітайскай мовах.