11 лютага 2026 года зала дакументаў па мастацтве Нацыянальнай бібліятэкі Беларусі ператварылася ва ўтульны кіналітаратурны салон, дзе панавала творчая атмасфера, якая аб'ядноўвае зацікаўленых, адукаваных гледачоў і ўдзельнікаў, кіназнаўцаў, філолагаў і перспектыўную студэнцкую моладзь. Невыпадкова сабралася такая колькасць наведвальнікаў, бо ў рамках цыкла кінапаказаў "Магія кінакадра" дэманстраваўся фільм Ісідара Аненскага "Чалавек у футарале" (1939), зняты па аднайменным апавяданні А.П. Чэхава.
Істотнай падтрымкай мерапрыемства і яго нязменным акцэнтам, як заўсёды, стала выступленне прадстаўніка аддзела экранных мастацтваў Інстытута мастацтвазнаўства, этнаграфіі і фальклору імя Кандрата Крапівы Цэнтра даследаванняў беларускай культуры, мовы і літаратуры НАН Беларусі - старшага навуковага супрацоўніка кандыдата мастацтвазнаўства, дацэнта Наталлі Агафонавай.
Наталля Анатольеўна выклала спецыфіку перакладу літаратурных першакрыніц на аўдыявізуальную мову, падрабязна і дэталёва расказала аб рэжысёрскай інтэрпрэтацыі чэхаўскага твору і значных зменах, якія дзеля стварэння поўнаметражнага фільма ўнёс Ісідар Аненскі ў кароткае апавяданне "Чалавек у футарале", пашырыўшы кола дзеючых асоб, колькасць дыялогаў і новых эпізодаў. З дапамогай Наталлі Анатольеўны гледачы яшчэ да прагляду карціны змаглі ўявіць няпросты механізм стварэння экранізацый, неабходнасць пашырэння ў сцэнарыі прасторы падзей і вобразаў, створаных пісьменнікамі.
Лагічным працягам абмеркавання стаў пазнавальны і інфарматыўны дыялог з магістрантам філалагічнага факультэта Беларускага дзяржаўнага ўніверсітэта, малодшым навуковым супрацоўнікам аддзела выданняў і тэксталогіі Інстытута літаратуразнаўства імя Янкі Купалы Цэнтра даследаванняў беларускай культуры, мовы і літаратуры НАН Беларусі Аляксандрай Глушаковай. З яе дапамогай гледачы з цікавасцю параўноўвалі вобраз Белікава ў апавяданні Чэхава і фільме Аненскага, разважалі над тым, што такое «футалар» і хто такія «футаларныя людзі», аналізавалі, які ўплыў мае літаратурны і экранны герой на асяроддзе, разам з філолагам шукалі адказ на важнае пытанне аб актуальнасці «футаларнасці» ў наш час. Некаторыя гледачы з задавальненнем выходзілі з уласных «футаралаў» і смела падтрымлівалі дыялог.
Тэкст і фота з сайта: Нацыянальная бібліятэка Беларусі
