30 красавіка 2026 г. адбылася прэзентацыя кнігі народных казак «Ішоў Бай па сцяне...» у апрацоўцы старшага навуковага супрацоўніка аддзела фалькларыстыкі і культуры славянскіх народаў Інстытута мастацтвазнаўства, этнаграфіі і фальклору імя Кандрата Крапівы Цэнтра даследаванняў беларускай культуры, мовы і літаратуры НАН Беларусі Юрыя Пацюпы і мастацкім афармленні Маі Пейхвасэр (Пракаповіч).

Зборнік спецыяльна арыентаваны на дзяцей дашкольнага і малодшага школьнага ўзросту, суправаджаецца прадмовамі для бацькоў і дзетак, многія казкі друкуюцца ўпершыню.

Мерапрыемства правяла загадчык аддзела фалькларыстыкі і культуры славянскіх народаў Таццяна Валодзіна.

На прэзентацыі ўдзельнікі Музычнай капэлы Цэнтра даследаванняў беларускай культуры, мовы і літаратуры НАН Беларусі выканалі песні па матывах беларускіх народных казак.

Аўтар апрацовак і мастачка расказалі, як нараджалася кніга, як узнікла яе ідэя, як праходзіў творчы працэс.

Сярод выступоўцаў былі як супрацоўнікі Цэнтра даследаванняў беларускай культуры, мовы і літаратуры НАН Беларусі, так і запрошаныя госці: Алена Боганева, загадчык сектара этналінгвістыкі і фальклору; Анатоль Трафімчык, загадчык аддзела ўзаемасувязяў літаратур; Алена Масла, пісьменніца-казачніца, рэдактар дзіцячых кніг; Аксана Спрынчан, паэтка, рэдактар дзіцячых кніг; Алена Вештарт, пісьменніца.

Казкі з кнігі прагучалі ў выкананні аўтара кнігі Юрыя Пацюпы і Ігара Чарнова, аспіранта аддзела тэатральнага мастацтва.