У навуковых даследаваннях распрацоўваюцца актуальныя пытанні ўсходнеславянскага літаратурна-культурнага ўзаемадзеяння, прапануецца новае прачытанне беларускай класікі ў супастаўляльным кантэксце. Асаблівая ўвага надаецца комплекснаму параўнальна-тыпалагічнаму аналізу сімволікі, аксіялагічнай змястоўнасці і сэнсавай глыбіні ключавых прасторавых вобразаў усходнеславянскіх літаратур, раскрыцці іх выяўленчага патэнцыялу ў трансляцыі духоўнай культуры, светапоглядных, ментальных адметнасцей беларускага, рускага і ўкраінскага народаў.

 

За перыяд працы ў Інстытуце ажыццёўлены наступныя даследаванні: “Якуб Колас і Міхайла Кацюбінскі: тыпалогія творчасці” // НДР “Культурна-гістарычныя беларуска-ўкраінскія сувязі: літаратурна-моўны аспект” (1996–1999); “Тарас Шаўчэнка і беларуская літаратура пачатку ХХ ст” // НДР “Беларуская літаратура ў кантэксце славянскіх літаратур” (2000–2003 ); “Паэмы Янкі Купалы і Тараса Шаўчэнкі ў кантэксце еўрапейскага рамантызму” // НДР “Еўрапейскі рамантызм і беларуская літаратура ХІХ – ХХ стст.” (2003–2006); “Прыродна-рэчыўная прастора ў творах Я.Коласа, М.Гогаля і Т.Шаўчэнкі” // НДР “Беларуская і еўрапейскія літаратуры ў агульнай прасторы маральных каштоўнасцяў” (2007–2010), “Мастацка-вобразная парадыгма хранатопу ў беларускай і ўкраінскай літаратурах першай паловы ХХ ст.” // НДР “Нацыянальныя тыпы ментальнасці ў беларускай і еўрапейскіх літаратурах: ідэйна-эстэтычная спецыфіка, стылявая эвалюцыя, перакладчыцкая інтэрпрэтацыя” (2011–2015), “Украінскі дыскурс у беларускай літаратуры ХХ ст.” // НДР “Беларуска-еўрапейскія літаратурныя ўзаемасувязі і імагалогія: міфы, стэрэатыпы, рэальнасць” (2016–2020).

 

Выступіла ў якасці кіраўніка праектаў, выкананых пры падтрымцы БРФФД “Тарас Шаўчэнка і Беларусь: тэарэтыка-аналітычны, даведачна-бібліяграфічны аспекты даследавання (матэрыялы для “Шаўчэнкаўскай энцыклапедыі”)”, “Прасторава-часавыя вобразы ў беларуска-славянскім літаратурным дыскурсе”, адказнага выканаўцы НДР “Парадыгма радзімы ў творчасці Тараса Шаўчэнкі і ў беларускай літаратуры ХІХ – пачатку ХХ ст.” і “Гістарычныя асобы і падзеі ў беларускай літаратуры ХІІ – пачатку ХХІ ст.: мастацка-вобразная і жанрава-стылістычная спецыфіка інтэрпрэтацыі”.

 

Уваходзіла ў склад аўтарскіх калектываў па падрыхтоўцы артыкулаў для энцыклапедыі “Максім Багдановіч” (Мінск, 2012) і Шаўчэнкаўскай энцыклапедыі ў 6-ці тамах (Кіеў, 2012-2015).

 

Аўтар больш за 170 навуковых прац.