13 лютага ў Вялікім тэатры Беларусі адбылася Вечарына беларускай культуры, перадае карэспандэнт БелТА.

Перад паказам оперы «Сівая легенда» гледачы змаглі стаць удзельнікамі інтэрактыву.

Выстава з фондаў Музея старажытнабеларускай культуры Цэнтра даследаванняў беларускай культуры, мовы і літаратуры Нацыянальнай акадэміі навук Беларусі пазнаёміла наведвальнікаў з традыцыйнымі беларускімі жаночымі касцюмамі з розных рэгіёнаў краіны.

"Касцюм любога народа ўбірае ў сябе яго традыцыі і паказвае становішча чалавека ў грамадстве. Беларускі касцюм у гэтым плане не выключэнне. Яго адрознівае разнастайнасць у рэгіёнах. У нашым музеі ёсць каля 100 комплексаў арыгінальных беларускіх касцюмаў. Гэта самая вялікая калекцыя беларускага народнага касцюма, і ў кожнага ёсць свае адметныя асаблівасці. Напрыклад, у касцюмах Палесся і Брэстчыны прысутнічаюць чырвоны, зялёны, белы і нават чорны колеры», — расказаў загадчык аддзела старажытнабеларускай культуры Цэнтра даследавання беларускай культуры, мовы і літаратуры НАН Беларусі Барыс Лазука.

Тэкст і фота з сайта: Беларускае тэлеграфнае агенцтва (БЕЛТА)